«Ռ» հնչյունը համարվում է բազմաթրթիռ հնչյուն: Այն կարող է բացակայել / ռոտացիզմ/, փոխարինվել այլ հնչյունով / պարառոտացիզմ/ կամ արտասանվել աղավաղված:
«Ռ» հնչյունի բացակայության կամ սխալ արտաբերման պատճառ կարող են լինել.
- Լեզվի կարճ սանձիկը:
- Լեզվի մկանների թուլությունը:
- Լեզվով նպատակաուղղված շարժումներ կատարելու անկարողությունը:
- Հնչյունահնչույթային լսողության խանգարումը:
«Ռ» հնչյունն արտասանելու համար նախապատրաստող վարժություններ
- Բերանը բաց լեզուն հանել դուրս և մաքրել վերին շուրթը՝ լեզուն ուղղելով բերանի մի անկյունից մյուսը:
- Բերանը լայն բացել, լեզուն բերանի մեջ բարձրացնել վերև-ներքև , լեզվի ծայրով կատարել մաքրող շարժումներ:
- Լեզուն շարժել վերին կտրիչների մոտից դեպի փափուկ քիմք և հակառակը:
- Լեզուն ճտճտացնել, միայն հետևել, որ աշխատի լեզուն, իսկ ստորին ծնոտը չշարժվի:
- Լեզվով մաքրել վերին կտրիչների հետևի մասը՝ շարժելով աջ-ձախ:
- Լեզվի ծայրը փոքր-ինչ դուրս հանել և փչել դանդաղ և երկարատև:
- Լեզվի ծայրին դնել երկար թղթե շերտիկ և փչել վրան:
- Լեզուն պահել վերին կտրիչների հետևում և օդի հոսքով արտաբերել հըըրրր ՝ հնարավորինս երկարատև՜ ստանալով մոտավոր թրթիռ լեզվի ծայրամասային հատվածում:
- Երկարատև և դանդաղ տեմպով փչել վառվող մոմի վրա այնպես, որ այն չհանգչի:
Պարբերաբար վարժությունները կատարելիս` լեզուն դառնում է առավել ճկուն և հնարավոր է նմանակմամբ ստանալ այն: Վարժությունները կատարել ամեն օր, ցանկալի է հայելու դիմաց ՝ 10 րոպե տևողությամբ:
Pingback: Թվային միջոցները`արտասանական խնդիրները հաղթահարելու միջոց | Աննա Օհանյան